Killer Karaoké (غني لو تقدر)

Killer Karaoké  (غني لو تقدر) برنامج عم ينعرض على شاشة ال MTV. الفكرة  تبعو منا جديدة ومأخودة من برنامج أجنبي متل كل هالبرامج العم تستوردا اذاعاتنا. منيحة كانت أو عاطلة، مش مهم، المهم نعبي الهوا "ونسلي" هالناس شي شوي.  

 المشارك بدو يغني وبذات الوقت بكون عم يتعرض  لمواقف كتير صعبة بدو يضل خلالها مركز عالغنيّة  لو شو ما صار معو. بأول مرحلة، الجمهور بصوت لأكتر شخص احترم قواعد البرنامج وبتاني مرحلة، المشترك بيتكل على توازنو ليربح لحد ٣٥٠٠٠$.

راح أعطيكن متل زغير عن أول مرحلة من :Killer Karaoké مشترك غطّسوا بالمي السخنة و ومن بعدا بالمي المسقعة و بيرجع مي فاترة بس مع ضفادع اكسترا  ومشتركة  حطوا بتابوت فراعنة و كبو عليها دود و حيات من كل الأنواع؛ و كل ما صرخت كل ما كبو عليها أكتر، و غيرا و غيرا من المواقف المقرفة (صراصير, فيران ، كهربا...) يللي بتستغل خوف الناس وبتستفز المشارك. ما بعرف شو خطرلن  هالناس ليوافقو يكونو بهيك برنامج، وما بعرف شو خطرلن ال MTV ليجيبوا هيك مقدمين  ويسمحولون يضحكو عالعالم و ينبسطو بصريخن (كل هيدا و هن عم بصرخو علينا بذات الوقت).

أنا و عم بحضر، كذا فكرة خطرت عا راسي. منا إنو قدي الناس مستقتلة لتربح مصاري، لوين مستعدة تروح كرمال مبلغ من الكاش.  معقول صرنا مجتمع رخيص بيعمل المستحيل كرمال المصاري، و بيقنع حالو إنو عم يتسلى  ويسلي غيرو؟  معقول صرنا مجتمع بيتسلى لما يشوف غيرو عم ينذل و يصرخ و يعاني و كل ما صرخ غيرو وخاف كل ما انبسط أكتر؟ خلصت الأفكار الحلوة لبتسللي بلا ما تهين الإنسان؟

عيب هيك برنامج ينعرض ع شاشتنا وبما إنو ما في شي جابرني احضر، كانت أول مرة واخر مرة.

Rating : 0/5